मुंबई, (०६ जुलै २०२५): महाराष्ट्राच्या राजकारणात सध्या एका नव्या वादळाची चाहूल लागली आहे. भारताची आर्थिक राजधानी असलेल्या मुंबईला केंद्रशासित प्रदेश (Union Territory) करण्याचा मुद्दा पुन्हा एकदा ऐरणीवर आला असून, या मागणीने राजकीय वर्तुळात मोठी खळबळ उडवून दिली आहे.
मुंबईतील व्यावसायिक आणि बाहेरून आलेल्या नागरिकांवर होत असलेल्या कथित मारहाणीच्या विरोधात राष्ट्रवादी काँग्रेसच्या (अजित पवार गट) महाराष्ट्र प्रदेश उपाध्यक्ष हाजी मोमीन भाईजान यांनी जोरदार आवाज उचलला आहे. “ठाकरे बांधवांच्या गुंड प्रकृतीच्या लोकांमुळे गुजराती, मारवाडी, उत्तर भारतीय ह्या समाजाच्या लोकांना मुंबईत राहणे कठीण झाले आहे,” असा थेट आरोप भाईजान यांनी केला आहे. मराठी बोलण्याची सक्ती आणि त्यातून होणारी मारहाण यामुळे इतर राज्यांतून आलेल्या लोकांसाठी मुंबईत राहणे कठीण झाले आहे, असे त्यांचे म्हणणे आहे.
यामुळे मुंबईतील अनेक व्यावसायिक कंपन्या आणि मोठे प्रकल्प गुजरातमध्ये स्थलांतरित झाले आहेत. आंतरराष्ट्रीय स्तरावर मुंबईची प्रतिमा मलिन होत असून, याचा थेट परिणाम भारतीय गुंतवणुकीवर होत असल्याकडेही भाईजान यांनी लक्ष वेधले आहे. या सर्व परिस्थितीवर उपाय म्हणून, केंद्र सरकारने मुंबईला केंद्रशासित प्रदेश घोषित करावे, अशी ठाम मागणी हाजी मोमीन भाईजान यांनी केली आहे.
या मागणीमुळे महाराष्ट्राच्या राजकारणात नवे वादळ निर्माण होण्याची शक्यता आहे. मुंबईच्या भवितव्यावर याचा काय परिणाम होतो, हे पाहणे महत्त्वाचे ठरेल.
